192 Datum in Bruna anno incarnationis dominice MCCLV. XII. Kalendas Martii per manus domini Wilhelmi nostri notarii. Ex originali in archivo ejusdem monasterii. CCXVII. Alexander papa IV. fratri Bartholomaeo de Boëmia, ordinis Minorum, mandat, ut contra „Lithvanos et Jentuesones et alios ethnicos" verbum crucis praedicet et praedicari faciat in Polonia, Boëmia, Moravia et Austria. Di. Anagniae, VIII. Idus Augusti, 1255. Alexander episcopus seruus seruorum Dei. Fratri Bartholomeo de Boemia, ordinis fratrum Minorum. Nuper ad audientiam nostram peruenit quod Lithvani et Ientuesones ac nonnulli alii ethnici, qui Romanam Ecclesiam numquam matrem sue professione fidei agnouerunt, vires exacuunt contra ipsam, dum iidem Christianorum finitimas, videlicet Poloniam et quasdam alias vicinas prouincias hostialiter (sic) inuadentes, multos ex populo Christiano morti et infinitos captiuitati dederunt, non parcendo sexui vel etati; et nec adhuc fidelium saturati cruore, ad impugnandum cum aliis paganis et infidelibus Poloniam et regiones finitimas conflati in unum viribus se accingunt. Propter quod nos graui dolore confodimur, et super tanta strage fidelium paterno compatientes affectu, remedia per que tantis obuietur periculis sollicite cogitamus. Nos igitur de circumspectione tua, nobis a pluribus et in pluribus commendata plenam in domino fiduciam obtinentes, mandamus quatenus tam per te quam per fratres tui ordinis, quos ad hoc idoneos esse cognoueris, in Polonia, Boemia, Morauia et Austria, contra predictos paganos predices et predicari facias verbum crucis, concessa per nos auctoritate nostra illis Christianis earumdem partium, qui contra infideles eosdem crucis assumpto signaculo se duxerint accingendos, suorum venia peccatorum, que darit (sic) consuerit euntibus in subsidium terre sancte. Datum Anagnie, VIII. Idus Augusti. Pontificatus nostri anno primo. Ex autographo Regesto Alexandri IV. anni I. epist. 564. in tabulariis Vaticanis.