166 nostri, domini Theodrici abbatis Ecclesie Syloensis ad hoc fauorabiliter accedente, In quorum omnium testimonium et memoriam futurorum presentes literas tradendas duximus, eiusdem Re- uerendi in Christo patris, ac nostrorum Sygillorum munimine roboratas, Actum et Datum in Chunicz. Anno domini Millesimo Trecentesimo, vicesimo Tercio, duodecima Kalendas Marcij. (Orig. membran. cum III. sigillis bene conservatis in archivo monasterii „Aula S. Mariæ“ apud C. R. Gubern. Brunæ sub lit. A. n. 7.) CCXXIV. Johannes, papa XXII., mandat . . episcopo Nitriensi et archidiaconis Nitriensi ac Trenčiniensi, ut episcopum Olomuc. et fratres ordinis Minorum conventus Brunden. ad restitutionem bonorum ecclesia Albensi pertinentium compellant. Dt. Avinione II. Kalend. Martii 1323. Johannes Episcopus Servus Servorum Dei Venerabili Fratri .. Episcopo Nitriensi et dilectis filiis Nitriensi ac Trinchiniensi Nitriensis Diocesis Archydiaconis Ecclesiarum Salutem et Apostolicam Benedictionem. Significavit nobis venerabilis frater noster Andreas Episcopus Albensis in Ungaria quod bone memorie Martino ordinis fratrum minorum, Episcopo Albensi predecessore ipsius in Regno Boemie unde originem traxerat, videlicet in Olomucensi Diocesi decedente, bona mobilia que ratione Episcopalis dignitatis seu officii Ecclesie Albensis idem Martinus dum vixerat ibidem acquisiverat, venerabilis frater noster Episcopus Olomucensis immo fratres dicti ordinis, Conventus Brundensis et nonnulle persone ecclesiastice et etiam seculares eiusdem diocesis nequiter occuparunt, et ipsa detinent occupata, quamquam predicta bona ad dictam Albensem Ecclesiam noscantur rationabiliter pertinere. Quocirca discretioni vestre per apostolica scripta mandamus, quatinus vocatis qui fuerint evocandi, si vobis sim- pliciter summarie et de plano sine strepitu et figura iudicii constiterit de premissis, prefatum Episcopum Olomucensem et quoscumque alios occupatores et detentores dictorum bonorum cuiuscumque dignitatis status ordinis vel conditionis existant, quod predicta bona eidem Andree Episcopo nomine dicte Albensis Ecclesie restituant ut tenentur, auctoritate nostra Appellatione postposita compellatis. Testes autem qui fuerint nominati si se gratia odio vel timore subtraxerint, per censuram ecclesiasticam appellatione cessante cogatis veritati testimonium perhibere. Non obstantibus felicis recordationis Bonifacii Pape VIII. predecessoris nostri qua cavetur, ne aliquis extra suam Civitatem et diocesim nisi in certis exceptis casibus ad iudicium evocetur, seu ne iudices a sede apostolica deputati extra Civitatem et Diocesim in quibus deputati fuerint, contra quoscunque procedere, sive alii vel aliis vices suas committere, aut aliquis ultra unam dietam a fine dioc. eorundem trahere presumant, seu de duabus dietis in Concilio generali, dummodo ultra tertiam vel quartam dietam, aliquis extra suam civitatem et diocesim auctoritate presentium non trahatur, et aliis quibuscumque constitutionibus a predecessoribus nostris Romanis Pontificibus tam de iudicibus delegatis quam personis ultra certum numerum ad iudicium non vocandis, aut aliis editis que nostre possent in hac parte iurisdictioni eiusque libero exercitio quomodolibet obviare. Seu si prefatis Episcopo et fratribus ordinis vel ordini memorato, aut quibuscumque aliis communiter vel divisim a prefata sit sede indultum, quod excommunicari suspendi vel interdici seu extra vel ultra certa loca ad iudicium evocari