108 135. Vergleich zwischen dem Kloster Bruck und dem St. Clara Kloster in Znaim bezüglich des Gerichtes uber ihre Unterthanen und die Weide derselben in Taswitz. Dt. Bruck 28. Juli 1359. Wir Ott von gots gnaden Abpt, Przedslab der Prior vnd Vincencius der Sup- prior ze Pruk dez Ordens von Premonstrey, vnd ich Bonka Abptyssyn, vnd swester Chunka alt Abptyssin, Jutka ir swester, vnd Kathrey, Pauleins tochter von Znoym, dez Closters vnd dez Ordens sand Clara ze Znoym, vnd vnser peyder Conuent, wir veriechen offenleich mit disem brief vnd tuen chunt allen den, di in sehent oder horent lesen, di nu leben vnd hernach chunftig sind, daz wir vmb allen widerstoz vnd vmb allen chrig, der ge- wesen ist zwissen vns vnd vnsern leuten, da ze Taswicz, ez sey vmb daz gericht, oder vmb di wiechtrift, vmb di wayd oder vmb di gemainschaft, ez sey an wasser oder an gepot, di man auf seczen schol in dem aygen, vmb freyheit oder vmb wandl, daz wir dez alles vns gesacz haben genzleich vnd aller ding mit woluerdachtem mut vnd mit rat weisser leut hin czu den erbarn leuten Sygleyn von Gnest vnd Weicharten von Hodnicz, also daz di vns bescheiden schullen vmb allen chrieg zwissen vns, nach got vnd nach recht vnd nach iren trewen vnd nach weisheit, di in got geben hat. So haben di selben erbarn man gemacht vnd gesprochen an dem ersten wort: vmb das gericht do ze Taswicz payderseit zwissen vnsern leuten, daz dez abptes leut, di do genant sind Newsstifter vnd widmer vmb semplist schult, di si begehen auf der Abptissin gut, ob si bechumert werden vnd begriffen, ez sey vmb vnczucht oder vmb halsgericht, ez sey vmb clayn schult oder vmb grozz, wy di sey genant, dar vmb schol, der geschult hat, ein recht leiden auf der wrawen gut vnd ir richter schol gewalt haben dar vber ze richten, vnd schol der selben richter haben di wer, di er begriffen hat pay dem, der geschult hat ; aber di wandl, di ortailet werden, schullen gevallen dem Abpt; vnd ob der man, der do geschult hat, hin chumet ob dem gut vnuechumert vnd nicht begriffen wirt, so schol man im czu sprechen vor seiner herschaft oder vor seinem richter vnd schol der schuldiger chayner freyung nicht genisen furbas, noch auf des Abptes gut noch auf der wrowen gut. Wer das man ze hant rechts helfen schol payderseyt, als vorgeschriben ist vnd alles das gesprochen vnd benant ist vmb di gericht von der wrawen wegen, di selben recht gleicherweiz schol haben der Abpt vnd sein richter auf seynem gut vnd auch seyn leut vmb allen schult vnd vmb allen Wandlung . So haben darnach di vorgenanten erbarn leut gesprochen vmb di waid vnd vmb di wiechtrift vnd vmb allen gemainschaft ze weld vnd ze dorf, wy di genant sey, das des Abptes leut haben schullen gemainschaft ze weld vnd ze dorf, an waid, an wasser, an aufgangen, an Ingangen, an steyg vnd an wegen, an gassen vnd an strassen, mit irem wiech gleicher weisz als der Abptyssin leut, an so wil, was der erden sey zu der wiechtrift auf der Abptyssin gut, di schullen vier erbar man von dem aygen, di dar zu erwelt werden pey iren trewen schatzen vnd di selben erden nach der schatzung schullen ze hant vergelten vnd widercheren des Abpts leut den leuten, den entzogen wirt